قصيده اولى في بدايته الفنيه للشاعر سمير صبيح

لتصدك يمرنه بيوم نسيان
ونجذب لو نكول شصار ناسين

جروحك من تطيب تعوف نيشان
مثل حنة جوامع عالحياطيـن

وتعلمنه درس من هاي الجروح
شنهي السيف لو ما قبظة الأيد
شما يعلة العنب منكول منلوح
نعد غصنه وتجي مدنكه العناكيد
ونشف ماي النهر ما حاجه سابوح
ولحك تمر النخل وين الصواعيد
كفانه نكول نار وهيا دخــان
ونقره الخوف بوجوه الحياطيـن
نضل جم دوب محطوطين نيشان
ونودي نذور لحلوك السجاجين
وزرعنه العود عود يخضر العود
ويمد جفه غصن ويشك التراب
السنابل دنكت وتريد حاصود
وبقه بيت البلابل ينعه الغراب
أذا ماكو بعد للثار هادود
بعد ليش وعليمن نسرك الباب
حطونه سهر بعيون نعسان
وزرعونه أثل نحمي البساتين
تضل وكفه الدلال بوسط نيران
وتدنك من تجي يم الفناجـين
ورجعنه نكول سهله نعوض الراح
لان وكت الحجي واحدنه منشار
واذا صارت دموع نصير تمساح
وللسكته افتعلنه اعذار وعذار
ونعاين عالزرع بعيون فلاح
نشوفه يموت بس بعيده الانهار

سجين آنه صحيح وأنته سجان
آنه وياك بالمنطق مساجيـن
تره الجرحه حقيقي يعوف نيشان
مثل حنة جوامع عالحياطين