بستان الحبايب
عاشكَ بس عشكَ مثل المجانين
وماكَلكم عليهه بس تعرفوهه
ومدمن حيل حبهه صارالسنين
واذادّورّون عنهه بيه تلكَوهه
اصيله معدله اربات الدواوين
وتحير الوصفهه كلما يوصفوهه
ربطتهه الشرف والعزه والدين
واشكَد حاولوا بس ما يفلوهه
ووجه واحد وجهه يعني وجهين
ماصارت ولا كَدروا يغيـروهه
وطبع بيهه الكرم مثل الفناجين
تنطي بلا ثمن تزعل يخضّوهه
وتذكر بالفرح حتى المبعدين
واذا مرهه الحزن ترفض يعزّوهه
ويحبوهه شكثر واكثر مكرهين
وحتى اليكرهوهه يحبّوهه
وعدد دمع اليتامه والمساكين
اخاف اعليهه من عين اليحسدوهه
وطيبتهه نهر وايفيض صوبين
محتاجين اكمل لو عرفتوهه ؟!
اهي بغداد يالتسوه الملايين
جنّه عالأرض للّيقدروهه
وبااوراق الكتب تعني كلمتين
بستان الحبايب همه سمّوهه
بستان الحبايب همه سمّوهه
اتمنه عجبتكم ومنتظر ردودكم الحلوه