صباح الخير او مساء الخير لكل الدكاتره والدكتورات ((حسب شوكت حتقرون الموضوع))
اشلونكم ؟؟؟؟
اكيد كلنه نتعرض بحياتنه لعده لمواقف مزعجه ومحرجه ((منتمناهه لعدونه))بحيث نتمنى بس يخلص هذا الموقف الي صرنه بيه ونكوم نمشي ونكول((ساعه السوده.....))
لكن مع مرور الايام غالبا ما يتحول هذا الموقف المحرج الى حادثه مضحكه وطريفه نتذكرهه ونضحك عليهه كل ما تصير فرصه
هسه اريد من كل عضو ان يذكرنه فد حادثه صارت بيه ولحد هسه مخزونه بباله ومينساهه ابد
واني راح ابدي
في يوم من الايام الخريفيه ببدايه السنه طلعت الصبح من البيت ورحت للدوام مثل كل البشر وجان اليوم كلش حلو من الصبح ((صوت فيروز..هوه عليل يرد الروح...ماكو محاضرات هواي لان بعدني ببدايه السنه....ابو الخط اجه بوكته لاول مره...واني جنت طالعه اخبل ولابسه حذاء ابواعلى كعب بعد فتره الحرمان بالاعداديه ))لذلك جان اليوم يبشر بالخير من كل النواحي
طبيت للكليه متباهيه بحذائي ((اول مره ادشنه))
وجانت كل الكليه بكل مراحلهه ملمومه بالسنتر ماادري ليش((حظي الاكشر))
واني داامشي وطبعا الحذاء يسوي جق.جق........حق.جق......جق.جق.....جق.جق.......جق فقط
طبعا اني تفاجأت كلت هاي شنو اشو جق وحده مو اثنين
كلت شنو القصه جربت امشي مره لوخ
جان اسمع جق وحده
كلت هاهيه ثبتت الرؤيه
دنجت راسي جان اشوف الي جنت خايفه منه
كعب حذائي انشلع
طبعا ببدايه الدوام وبعدني مااعرف احد والاشويه وابجي
وكاعده واكول شجاني ولبسته لو باقيه علبوتين احسن
المهم طلع اليوم من خشمي كظيت اليوم كله كاعده بزاويه بالنادي
انتظر الفرج
وطبعا صديقتي كاعده وخربانه من الضحك عليه
المهم خلص الدوام على خير وسلامه
ورجعت للخط ((عروجه بتي))
وكلت التوبه من هلنوبه بعد فلا البس كعب عالي بالدوام
وصدك هسه من نكعد اني وصديقتي دائما نتذكر هذا الموقف ونضحك عليه
ها نسيت اكلكم التوبه مجانت توبه نصوحه ....لان رجعت لبست نفس الحذاء وره اسبوع((بعد التصليح اكيد))
يله هسه نريد نعرف المواقف المحرجه الصايره بيكم
موضوع: مواقف مضحكه 
الجمعة يوليو 18, 2008 1:28 pm
